Foilsítear iarratas ar phaitinn, sé sin go mbíonn cáipéisí áirithe a bhaineann leis an iarratas oscailte d’imscrúdú poiblí, chomh luath is atá indéanta tar éis tréimhse 18 mí ón dáta comhdaithe (nó ón dáta tosaíochta más ann dó), ach amháin sa chás gur diúltaíodh nó gur tarraingíodh siar é ar deireadh roimh fhoirceannadh na n-ullmhaithe teicniúla don fhoilsiú. D’fhéadfaí é a fhoilsiú áfach níos luaithe ar iarraidh ón iarrthóra.
Fógraítear foilsiú an iarratais in Iris Oifig na bPaitinní. Tá cóipeanna de na hiarratais atá foilsithe ar fáil d’aon duine ar mhian leis nó léi iad a scrúdú nó a cheannach.
Iris Oifig na bPaitinní
Foilsíonn an Oifig Iris Oifig na bPaitinní ar bhonn coicíse; foilsítear í ar an gCéadaoin de ghnáth. Tá an Iris roinnte ina dhá chuid.
Baineann Cuid 1 le paitinní agus dearaidh agus cuimsíonn sí faisnéis faoi cheannteidil ar leith, lena n-áirítear,
- Iarratais ar phaitinn a comhdaíodh.
- Iarratais a foilsíodh.
- Iarratais a deonaíodh.
- Paitinní Eorpacha a deonaíodh ina sainíodh an Stát.
- Iarratais atá as feidhm.
- Iarratais a tarraingíodh siar, nó a mheastar a bheith tarraingthe siar nó a diúltaíodh.
- Paitinní atá sa feidhm.
- Imeachtaí faoi Acht na bPaitinní, 1992.
- Ábhair a bhaineann le Deimhnithe Cosanta Forlíontacha.
Cuimsítear i gCuid II den Iris faisnéis a bhaineann le trádmharcanna.
Soláthraíonn an Oifig leagan idirghníomhach, ar líne den Iris, lena n-áirítear áiseanna cuardaigh. Féadfar na hIrisí a fheiceáil ar líne trí an suíomh gréasáin nó dul i gcomhairle leo ar iarratas ónár oifigí i gCill Chainnigh agus i mBaile Átha Cliath nó a cheannach go díreach ón Oifig nó ó Oifig Dhíolta Foilseachán Rialtais.